சிறுநீரக சத்திர சிகிச்சை; 35 சிறுநீரகக் கற்களை அகற்றி டாக்டர் சமீம் மற்றொரு சாதனை!

Slide3

(அஸ்லம் எஸ்.மௌலானா, பி.எம்.எம்.ஏ.காதர்)

சம்மாந்துறை அன்வர் இஸ்மாயில் ஆதார வைத்தியசாலையின் சத்திர சிகிச்சை நிபுணர் டாக்டர் ஏ.டபள்யூ.எம்.சமீம் சத்திர சிகிச்சையில் மற்றொரு சாதனை படைதுள்ளார்.

சம்மாந்துறை அன்வர் இஸ்மாயில் வைத்தியசாலையில் அனுமதிக்கப்பட்ட நோயாளி ஒருவருக்கு மேற்கொள்ளப்பட்ட சிறுநீரக சத்திர சிகிச்சையின் போது சிறுநீரகத்தில் இருந்து 35 சிறிய சிறுநீரகக் கற்களை அகற்றியதன் மூலம் டாக்டர் சமீம் இந்த சாதனையை படைத்துள்ளார்.

அதே தினத்தில் இன்னுமொருவருக்கு செய்யப்பட்ட மற்றுமொரு சிறுநீரக சத்திர சிகிச்சையின் போது பெரிய அளவிலான மற்றுமொரு சிறுநீரகக் கல்லையும் டாக்டர் சமீம் அகற்றியுள்ளார்.

சத்திர சிகிச்சை மூலம் அகற்றப்பட்ட சிறுநீரகக் கல்லில் ஒன்று மான்கொம்பு வடிவில் அமைந்திருந்தமை குறிப்பிடத்தக்கதாகும்.

குறித்த நோயாளியின் குருதி (0-) வகையானதாக இருந்ததாகவும் இந்த வகையான குருதியை அம்பாரை மாவட்ட வைத்தியசாலைகளில் பெறுவது மிகவும் கடினமா இருந்தால் அம்பாரை வைத்தியசாலையில் இருந்து பெறப்பட்ட ஒரு பைந் குருதியை நம்பியே இந்த சத்திர சிகிச்சையை செய்யப்பட்டதாகவும் டாக்டர் சமீம் தெரிவித்தார்.

மேலும் கல்முனை அஷ்ரப் வைத்தியசாலையின் மயக்க மருந்தேற்றல் நிபுணரின் பூரண ஒத்தழைப்புடன் இந்த சிறுநீரக சத்திர சிகிச்சையை வெற்றிகரமாக செய்ய முடிந்ததாகவும் சம்மாந்துறை அன்வர் இஸ்மாயில்; வைத்தியசாலையின் சத்திர சிகிச்சை நிபுணர் டாக்டர் ஏ.டபள்யூ.எம்.சமீம் மேலும் தெரிவித்தார்.

Slide2Dr (2)Dr (1)

சிறுநீரகத்தில் கற்கள் உருவாவதைத் தடுப்பதற்கு சத்திர சிகிச்சை நிபுணர் டாக்டர் ஏ.டபள்யூ.எம்.சமீம் அவர்கள் வழங்கும் அறிவுரை;

இன்று இலங்கையைப் பொறுத்தவரைக்கும் அதிகரித்துக் கொண்டு வரும் ஒரு நோயாக விளங்குவது தான் சிறுநீரகத்தில் கற்கள் உருவாதல் என்பது.

இதனால் இளம்பராயத்தினர் இடுப்பு வலி, அடிவயிற்று வலி, சிறுநீர் கழிப்பதில் எரிவு மற்றும் அவ்வாறு கழிக்கும்போது இரத்தம் வருதல் போன்ற பல பிரச்சினைகளுக்கு ஆளாகின்றனர்.

இதற்கெல்லாம் மூலக்காரணம் சரியாக நீர் அருந்தாமையே ஆகும். ஆமாம் மனிதன் சராசரியாக ஒரு நாளைக்கு 3 – லீற்றர் வரைக்குமான நீரை அருந்த வேண்டும். அது மிகவும் தூய்மையானதாக இருக்க வேண்டும்.

யாழ்ப்பாணம், வவுனியா அனுராதபுரம் போன்ற இடங்களில் எல்லாம் நீரில் அதிகளவாக கல்சியம் படிந்து காணப்படுகிறது. அந்நீரை அப்படியே பருகாது அதனை சூடாக்கி அந்நீரில் காணப்படும் கல்சியத்தின் செறிவைக் குறைத்தே அருந்த வேண்டும்.

உங்களுக்கு தொடர்ச்சியாக குளிர் காய்ச்சல், சிறுநீர் கழிக்கும்போது எரிச்சல் மற்றும் இரத்தம் வெளியேறுதல் போன்ற அறிகுறிகள் காணப்பட்டால் உடனே வைத்தியரை நாடுங்கள். காரணம் அது பெரும்பாலும் சிறுநீரகத்தில் கல் உருவாகி இருப்பதற்கான அறிகுறிகளாக இருக்கலாம்.

அவ்வாறு இக்கல் உருவாகி சிறுநீர் அடைபடுமானால் அதனை வைத்தியர்கள் X-RAY UltraSound Scan செய்து கற்கள் எந்த இடத்தில் அடைத்திருக்கின்றது என்பதனைக் கண்டறிந்து- அதற்கேற்ப சிகிச்சை அல்லது சத்திர சிகிச்சைகளை மேற்கொண்டு அச்சிறுநீரக கல்லினை சிறுநீரகத்திலிருந்து அகற்றுவார்கள்.

இதற்காக நீங்கள் பயப்பட தேவையில்லை. ஆனால் அலட்சியமாக இருக்காதீர்கள். காரணம் நீங்கள் தொடர்ச்சியாக அதனை கவனிக்காமல் இருப்பீர்களேயானால் அது சிறுநீரில் பற்றீரியா தொற்றை ஏற்படுத்தலாம். இதனால் சிறுநீரகம் சார்ந்த பல விளைவுகளை நீங்கள் எதிர்காலங்களில் எதிர்கொள்ள நேரிடலாம்.

இதனை முற்றாக நீங்கள் தவிர்த்துக் கொள்ள வேண்டுமா? ஒரு நாளைக்கு 3-லீற்றர் வரைக்கும் நல்ல சுத்தமான நீரை அருந்துங்கள். இதனால் சிறுநீரகத்தில் கல் ஏற்படுவதை மாத்திரமன்றி உங்கள் உடம்பில் ஏற்படும் பல நோய்களுக்கும் பிரச்சினைகளுக்கும் இலகுவான தீர்வினை நீங்களே பெற்றுக் கொள்ளலாம்.

Leave a Reply

Your email address will not be published. Required fields are marked *

*
*