மு.கா.எழுச்சி மாநாட்டு எதிரொலி; சிறுவர்கள் உட்பட 21 பேர் கைது; 12ஆம் திகதி வரை விளக்கமறியல்..!

(அஸ்லம் எஸ்.மௌலானா)

சாய்ந்தமருது பிரதேசத்தில் இடம்பெற்ற ஸ்ரீலங்கா முஸ்லிம் காங்கிரஸின் எழுச்சி மாநாட்டின்போது குழப்பம் விளைவிக்க முற்பட்ட குற்றச்சாட்டில் சந்தேகத்தின் பேரில் 21 பேர் கைது செய்யப்பட்டு, 12ஆம் திகதி வரை விளக்கமறியலில் வைக்கப்பட்டுள்ளனர். இவர்களுள் சிறுவர்கள் பலர் அடங்குவதாகவும் தெரிவிக்கப்படுகிறது.

ஸ்ரீலங்கா முஸ்லிம் காங்கிரஸின் “மாண்புறும் சாய்ந்தமருது” எழுச்சி மாநாடு பலத்த பாதுகாப்புக்கு மத்தியில் அதன் தலைவரும் அமைச்சருமான ரவூப் ஹக்கீமின் பங்கேற்புடன் நேற்று சனிக்கிழமை மாலை சாய்ந்தமருது பௌசி மைதானத்தில் நடைபெற்றது. இதனை முன்னிட்டு சாய்ந்தமருதில் அன்றைய தினம் ஹர்த்தால், கடையடைப்பு இடம்பெற்றதுடன் கறுப்புக்கொடி, செருப்புகள், துப்புத்தி தடிகள் கொண்டு எதிர்ப்பு நடவடிக்கை முன்னெடுக்கப்பட்டிருந்தது.

குறித்த எழுச்சி மாநாட்டின்போது கூச்சல், கூக்குரல் எழுந்ததுடன் அமைச்சர் ரவூப் ஹக்கீமின் உரையுடன் மாநாடு நிறைவடைந்த நிலையில் அங்கு கல்வீச்சு தாக்குதல்களும் மேற்கொள்ளப்பட்டிருந்தன. இதன்போது பொலிஸார் மற்றும் விசேட அதிரடிப்படையினர் உட்பட சிலர் காயமடைந்திருந்தனர்.

இதனைத் தொடர்ந்து கண்ணீர்ப்புகைத் தாக்குதல்களை மேற்கொண்ட பொலிஸார் அவ்விடத்தில் சிறுவர்கள், இளைஞர்கள் உட்பட 21 பேரை சந்தேகத்தின் பேரில் கைது செய்திருந்தனர். இவர்கள் இன்று கல்முனை மேல் நீதிமன்ற நீதிபதி நவரத்ன மாரப்பன முன்னிலையில் ஆஜர் செய்யப்பட்டபோது எதிர்வரும் 12ஆம் திகதி வரை விளக்கமறியலில் வைக்குமாறு உத்தரவிட்டுள்ளார்.

Leave a Reply

Your email address will not be published. Required fields are marked *

*
*