எம்.எஸ்.காரியப்பர் வீதி கல்வெட்டு உடைப்பு சம்பவம்; மாநகர சபை உறுப்பினர் ஹென்றிக்கு எதிரான வழக்கு ஒத்திவைப்பு..!

 எம்.எஸ்.காரியப்பர் வீதி கல்வெட்டு உடைப்பு சம்பவம்; மாநகர சபை உறுப்பினர் ஹென்றிக்கு எதிரான வழக்கு ஒத்திவைப்பு..!

(செயிட் ஆஷிப்)

கல்முனை நகரில் நிறுவப்பட்டிருந்த கேட் முதலியார் எம்.எஸ்.காரியப்பர் வீதிக்கான கல்வெட்டு உடைக்கப்பட்ட சம்பவம் தொடர்பில் கல்முனை மாநகர சபை உறுப்பினரும் டெலோ கட்சியின் முக்கியஸ்தருமான ஹென்றி மகேந்திரனுக்கு எதிரான வழக்கு விசாரணை எதிர்வரும் ஜூன் 16ஆம் திகதிக்கு ஒத்திவைக்கப்பட்டிருக்கிறது.

இவ்வழக்கு கல்முனை நீதவான் நீதிமன்றத்தில் நேற்று விசாரணைக்கு எடுத்துக் கொள்ளப்பட்டபோதே சாட்சிகளின் குறுக்கு விசாரணைகளுக்காக மேற்படி தினத்திற்கு ஒத்திவைக்கப்பட்டது.

கல்முனை பிரதான நெடுஞ்சாலையில் இருந்து சந்தாங்கேணி விளையாட்டு மைதானத்திற்கு செல்லும் பாதைக்கு கேட் முதலியார் எம்.எஸ்.காரியப்பரின் பெயர் சூட்டப்பட்டு, கடந்த 2015.08.09ஆம் திகதி பிரதமர் ரணில் விக்கிரமசிங்கவின் பங்கேற்புடன் இவ்வீதியை திறந்து வைப்பதற்காக மாநகர சபையினால் அப்பெயர் பொறிக்கப்பட்ட கல்வெட்டு நிறுவப்பட்டிருந்தது.

அதேவேளை, இப்பெயர் சூட்டலுக்கு எதிர்ப்புத் தெரிவித்து அன்றைய தினம் பிரதமரின் வருகைக்கு முன்னதாக அங்கு ஹென்றி மகேந்திரன் தலைமையில் ஆர்ப்பாட்டப் பேரணியொன்று இடம்பெற்றது. இதன்போது ஹென்றி கேந்திரன் சுத்தியல் ஒன்றினால் குறித்த கல்வெட்டை அடித்து நொறுக்கி வீழ்த்தினார் என்று அப்போதைய கல்முனை மாநகர முதல்வர் ஜனாதிபதி சட்டத்தரணி நிஸாம் காரியப்பரின் பிரத்தியேக செயலாளர் ரீ.எல்.எம்.பாறூக்கினால் கல்முனை பொலிஸ் நிலையத்தில் முறைப்பாடு செய்யப்பட்டது.

இதையடுத்து கல்முனை பொலிஸாரினால் கைது செய்யப்பட்ட ஹென்றி மகேந்திரன், 75000 ரூபாவுடன் இரண்டு சரீரப் பிணையில் விடுதலை செய்யப்பட்டிருந்தார்.

இச்சம்பவம் தொடர்பில் தாக்கல் செய்யப்பட வழக்கு விசாரணை கடந்த 05 வருடங்களுக்கு மேலாக இடம்பெற்று வருகின்ற நிலையில் ஹென்றி மகேந்திரன் சார்பில் சிரேஷ்ட சட்டத்தரணி என்.ஸ்ரீகாந்தா தலைமையிலான சட்டத்தரணிகள் ஆஜராகி வருகின்றமை குறிப்பிடத்தக்கது.

0 Reviews

Related post